.jpg){kind=spacer}
Under_Article_and_Middle_Ads_banner-01.jpg)
វេជ្ជបណ្ឌិត គួច ម៉េងលី៖ ពលរដ្ឋពុំអាចជឿនលឿនឡើយ បើទម្លាប់ជួបជុំគ្នាយកសុរាជាធំនៅតែបន្ត
ប្រភពរូប៖ សហការី
ដើម្បីជាការលើកកម្ពស់សុវត្ថិភាពចរាចរណ៍និងកាត់បន្ថយគ្រោះថ្នាក់ចរាចរណ៍នៅកម្ពុជា ក្រសួងចំនួន៣ គឺក្រសួងសាធារណការ ក្រសួងអប់រំ និងក្រសួងសុខាភិបាល កំពុងពិចារណាក្នុងការកំណត់អាយុអនុញ្ញាតឱ្យទទួលទានគ្រឿងស្រវឹងសម្រាប់មនុស្សពេញវ័យ។
ជុំវិញបញ្ហានេះ អ្នកឧកញ៉ា គួច ម៉េងលី ដែលជាអ្នកអប់រំ និងជាវេជ្ជបណ្ឌិតឯកទេសសុខភាពសាធារណៈ បានលើកឡើងថា ចំណុចនេះ គួរតែមានការសិក្សា និងអនុវត្តយូរមកហើយ ដ្បិតវាជាចំណុចមួយដែលរសើបលើការការពារសុខភាពពលរដ្ឋទូទៅ ព្រមទាំងកាត់បន្ថយចំណាយលើការព្យាបាល និងសេដ្ឋកិច្ចប្រទេសជាតិ។
រីឯការអនុញ្ញាតឱ្យទទួលទានគ្រឿងស្រវឹងដោយសេរី លោកវេជ្ជបណ្ឌិតថា ក៏ជាកត្តាមួយដែលអាចបង្កគ្រោះថ្នាក់ដល់ពលរដ្ឋទូទៅលើដងផ្លូវផងដែរ។ ប៉ុន្តែអ្នកផឹកនិងលក់គ្រឿងស្រវឹងដោយសេរី នឹងមានការប្រុងប្រយ័ត្នខ្ពស់ ប្រសិនបើក្រសួងមានការកំណត់អាយុអ្នកទទួលទានច្បាស់លាស់។
លោកបន្តថា ពេលតឹងរ៉ឹងច្បាប់នេះ នោះនឹងធ្វើឱ្យពលរដ្ឋមិនសូវទទួលរងគ្រោះដោយឥទ្ធិពលស្រា។ យ៉ាងណាមិញដូចជានៅប្រទេសមួយចំនួន អ្នកដែលទទួលមានសិទ្ធិសេពគ្រឿងស្រវឹងបាន លុះត្រាតែបុគ្គលនោះ មានអាយុ២១ឆ្នាំទើបច្បាប់អនុញ្ញាតឱ្យទទួលទាន។
បើយោងតាមច្បាប់នេះ លោកវេជ្ជបណ្ឌិត គួច ម៉េងលី មានប្រសាសន៍ថា ប្រសិនបើប៉ូសិលចាប់បានក្នុងស្ថានភាពស្រវឹង ឬបើកបរបុកប៉ះពារអ្វីនៅក្នុងស្ថានភាពស្រវឹង នោះច្បាប់គេនឹងផាកពិន័យធ្ងន់ធ្ងរជាខ្លាំង។ ជាក់ស្ដែងអាចជាប់ពន្ធនាគារមួយសប្ដាហ៍ ព្រមានលើការទទួលសុរា៦ខែ ត្រូវរៀនបើកបរ ខណៈធានារ៉ាប់រងអាយុជីវិតត្រូវបានដំឡើងខ្ពស់លើបុគ្គលអ្នកប្រព្រឹត្ត។
បន្ថែមពីនេះ ការសេពគ្រឿងស្រវឹងបានបង្កផលប៉ះពាល់ធ្ងន់ធ្ងរផ្សេងទៀត ដូចជាពេលសេពគ្រឿងស្រវឹងហើយ វានឹងធ្វើឱ្យបញ្ញាញាណ ស្មារតី សរសៃប្រសាទនានាទន់ខ្សោយ ដែលជាហេតុបង្កផលប៉ះទង្គិចជាខ្លាំងលើចរាចរណ៍បណ្ដាលឱ្យបាត់បង់អាយុជីវិត ព្រមទាំងខាតបង់របស់ទ្រព្យ។ នេះជាការពន្យល់បន្ថែមរបស់លោកវេជ្ជបណ្ឌិតឯកទេសសុខភាពសាធារណៈដដែល។
ទាក់ទិននឹងបញ្ហាដដែលនេះ លោកវេជ្ជបណ្ឌិត គួច ម៉េងលី បានសង្កត់ធ្ងន់ថា ការកំណត់អាយុអ្នកដែលអាចទទួលទានគ្រឿងសុរា គួរតែបង្កើតនិងអនុវត្តតឹងរ៉ឹងជាយូរមកហើយ ដ្បិតថាពលរដ្ឋខ្មែរដែលស្លាប់ដោយគ្រោះថ្នាក់ចរាចរណ៍ក្រោមឥទ្ធិពលស្រវឹងសុរា គឺតែងតែកើតមានជារឿយៗ។ ក្រៅតែពីការស្លាប់ ក៏មានអ្នកខ្លះបានរងពិការភាពទាំងផ្នែកអវយវៈ និងផ្នែកផ្លូវចិត្តផងដែរ។
លោកវេជ្ជបណ្ឌិតបញ្ជាក់ថា កាលពីមុននោះ សូម្បីតែនៅជុំវិញគ្រឹះស្ថានអប់រំសិស្ស ក៏មានកន្លែងលក់ដូរស្រាបៀរ និងហាងផឹកស៊ីជាដើម ដែលនេះពុំមែនជារូបភាពល្អគួរមានជុំវិញគ្រឹះស្ថានសិក្សាឡើយ ខណៈនាពេលបច្ចុប្បន្ន រូបភាពនេះត្រូវបានយកចិត្តជាខ្លាំងពីសំណាក់ស្ថាប័នពាក់ព័ន្ធនានា។
បើតាមវេជ្ជបណ្ឌិតជំនាញខាងលើ ការលក់គ្រឿងសុរាសេរី ការទទួលទានសេរីដោយគ្មានការកំណត់អាយុ និងគ្មានការពិនិត្យលើការលក់ដូរត្រឹមត្រូវ គឺស្ទើរតែក្លាយទៅជាគ្មានសណ្ដាប់ធ្នាប់ដែលអាចបង្កអសន្តិសុខក្នុងសង្គម ដោយសារតែការយកស្រាជាត្រីមុខពេលជួបជុំគ្នា ហើយការជួបជុំគ្នារបៀបនេះស្ទើរតែក្លាយទៅជាទម្លាប់ និងកើតមានស្ទើរគ្រប់ទីកន្លែង។
លោកបញ្ជាក់ថា «ម្នាក់ៗ គឺថាពេលថ្ងៃឈប់សម្រាកមានថៅកែមួយចំនួន ក្រុមហ៊ុនមួយចំនួន សូម្បីសមត្ថកិច្ចមួយចំនួន គឺប្រមូលបោះពុម្ពស្រា កន្លែងហុចស្រា ចែកចាយស្រា បំផុសបំផុលលក់ស្រា ផឹកស៊ីជប់លៀង ជាការលើកទឹកចិត្ត។ យើងគ្មានអ្វីជាការលើកទឹកចិត្តក្រៅពីការផឹកស៊ីលើកទឹកចិត្ត។ អ៊ីចឹងវាទៅជាវប្បធម៌គ្មានភាពថ្នៃថ្នូរ។ អ៊ីចឹងតាំងពីតូចដល់ធំ គឺតាមស្រុក តាមភូមិ តាមផ្ទះក្នុងសង្គមគ្រប់ទិសទីស្ទើរតែ៨ផ្ទះ ក្នុង១០ផ្ទះហើយ គ្មានអ្វីក្រៅពីផឹកស៊ី។»
លោកវេជ្ជបណ្ឌិតបានបញ្ជាក់បន្ថែមថា ប្រសិនបើទម្លាប់ផឹកស៊ីនេះនៅតែបន្ត នោះពលរដ្ឋមិនអាចជឿនលឿនបានឡើយ ហើយមិនមែនតែសុរាទេ ចំណែកបារីនិងគ្រឿងញៀនក៏ដូចគ្នាដែរ ដែលទាំងនេះតែងតែបង្កឱ្យមានអសន្តិសុខកើតឡើងនៅក្នុងសង្គម។
ជាមួយគ្នា លោកវេជ្ជបណ្ឌិត គួច ម៉េងលី បានសម្ដែងការសោស្ដាយចំពោះបញ្ហានេះថា «ខ្ញុំសោកស្ដាយដែលបានឃើញអ៊ីចឹងៗ កើតឡើងនៅស្រុកខ្មែរយើង។ ខ្ញុំសង្ឃឹមថា រដ្ឋាភិបាលនឹងមានការយកចិត្តទុកដាក់ខ្លាំង ជាពិសេសក្រសួងសុខាភិបាល ក្រសួងអប់រំ សាធារណជន គួរមានការយកចិត្តទុកដាក់ខ្លាំងបំផុត ដើម្បីពិន័យធ្ងន់ធ្ងរចំពោះអ្នកប្រព្រឹត្តដល់ជីវិតប្រជាពលរដ្ឋ និងអ្នកដទៃ ជាពិសេសបាត់បង់ឪពុកម្ដាយ បាត់បង់កូនចៅ។ អ៊ីចឹងដាក់ពិន័យដូចជាជាប់គុក ដកបណ្ណបើកបរ ក៏ដូចជាការសងជំងឺចិត្ត ប៉ុន្តែមិនអាចសងបានទេ ព្រោះការព្រឹត្តនេះធ្ងន់ធ្ងរណាស់»៕
Under_Article_and_Middle_Ads_banner-01.jpg)
