.jpg){kind=spacer}
Under_Article_and_Middle_Ads_banner-01.jpg)
លោក វ៉ែន ដារាបុត្រ អ្នកប្រើប្រាស់រថយន្តអគ្គិសនីមួយរូប បានប្រាប់ MJQTVថា លោកបញ្ចូលអគ្គិសនីសម្រាប់រថយន្តរបស់លោកក្នុងមួយសប្ដាហ៍ម្ដងដោយលោកត្រូវការអគ្គិសនីប្រមាណ៣០ទៅ៤០គីឡូវ៉ាត់ម៉ោង ក្នុងនោះលោកអាចបើកបរបានប្រមាណជាង៤០០គីឡូម៉ែត្រ។ លោកបន្តថា កាលពីមុនលោកបានប្រើប្រាស់រថយន្តដើរដោយចំហេះសាំង លោកចំណាយប្រមាណជាង២០ម៉ឺនរៀលក្នុងមួយសប្តាហ៍។ លោកបន្ថែមថា ក្រៅពីចំណាយតិចលើការធ្វើដំណើរភាពទំនើប និងសម្លេងស្ងាត់ល្អពេលបើកបរក៏ជាគុណសម្បត្តិមួយទៀតផងដែរ របស់រថយន្តដើរដោយកម្លាំងអគ្គិសនីមួយនេះ ខណៈដែល រថយន្តទំនើបប្រើអគ្គិសនី និងរថយន្តប្រើសាំង ម៉ាស៊ូត និង ហ្គាស គឺមានតម្លៃប្រហែលគ្នា។
ដោយឡែកការថែទាំ និងគ្រឿងបន្លាស់ផ្សេងៗវិញ លោកឱ្យដឹងថា ដោយសារតែរថយន្តរបស់លោកទិញមកថ្មីមិនមានអ្វីត្រូវខូចខាតច្រើននោះទេ ហើយប្រសិនបើមានកន្លែងខូចខាត ក្រុមហ៊ុនដែលនាំចូលរថយន្តមកលក់មានគ្រឿងបន្លាស់លក់ជូន។
យ៉ាងនេះក្តីលោក វ៉ែន ដារាបុត្រ ឱ្យដឹងថា នៅពេលបច្ចុប្បន្នកន្លែងបញ្ចូលអគ្គិសនីរថយន្តហាក់នៅមានតិចដែលធ្វើឱ្យអ្នកប្រើប្រាស់ហាក់ភ័យខ្លាចពេលដែលបើកបរផ្លូវឆ្ងាយហើយអស់អាគុយផ្គត់ផ្គង់អគ្គិសនី។
លោកសង្ឃឹមថា នៅពេលឆាប់ខាងមុខ កម្ពុជានឹងបំពាក់កន្លែងសាកអគ្គិសនីទៅរថយន្តបានទូលំទូលាយសម្រាប់អ្នកប្រើប្រាស់ ។
កាលពីពាក់កណ្ដាលខែកុម្ភៈ ឆ្នាំ២០២៣ រដ្ឋមន្ត្រីក្រសួងសាធារណការ និងដឹកជញ្ចូន លោក ស៊ុន ចាន់ថុល បានឱ្យដឹងថា ឆ្នាំ២០២២ ជាឆ្នាំដែលបើកទំព័រថ្មី លើការជំរុញឱ្យប្រើប្រាស់រថយន្តប្រើអគ្គិសនី ក្នុងនោះក្រសួងបានសហការជាមួយ UNDP ហើយUNDP បានផ្តល់ស្ថានីយបញ្ចូលថាមពលអគ្គិសនីចំនួន៤ ឱ្យមកក្រសួង។ ក្រសួងក៏បានសម្រេចដាក់នៅក្រសួងចំនួន១ ដាក់នៅក្រុងព្រះសីហនុចំនួន១ ដាក់នៅសៀមរាបចំនួន១ និងដាក់នៅបាត់ដំបងចំនួន១។ បន្ថែមពីនេះ ផ្នែកឯកជនក៏បាន ផ្តល់៣គ្រឿងបន្ថែមទៀត។
មកដល់ពេលនេះ មានរថយន្តប្រើប្រាស់អគ្គិសនីជាង៧០០គ្រឿងហើយដែលបានចុះបញ្ជី។ នេះបើតាមការអះអាងរបស់រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល៕
Under_Article_and_Middle_Ads_banner-01.jpg)
