វេជ្ជបណ្ឌិតជំនាញ បង្ហាញមូលដ្ឋានគ្រឹះនៃការសង្គ្រោះជីវិត ឬការសង្គ្រោះបឋម
ជាក់ស្តែងកាលពីថ្ងៃទី២២ ខែកុម្ភៈ កន្លងទៅថ្មីៗនេះ មជ្ឈមណ្ឌលភាសា អេ អាយ អាយ សាខាសៀមរាប សហការជាមួយមជ្ឈមណ្ឌលសុខភាពសិស្ស និន សុខរង្សី បានរៀបចំវគ្គបណ្តុះបណ្តាលស្តីពីការសង្គ្រោះបឋម ដល់លោកគ្រូ អ្នកគ្រូ និងបុគ្គលិកគ្រប់ផ្នែក ដើម្បីបង្កើនចំណេះដឹងពាក់ព័ន្ធនឹងវិធីសាស្ត្រនៃការសង្គ្រោះបឋម។
លោក វ៉ាន់ សុជា ប្រធានផ្នែកលេខាធិការកម្មវិធីសិក្សា នៃមជ្ឈមណ្ឌលភាសា អេ អាយ អាយ សាខាសៀមរាប បានឱ្យដឹងថា វគ្គបណ្តុះបណ្តាលនេះធ្វើឡើងដើម្បីឱ្យលោកគ្រូអ្នកគ្រូ និងបុគ្គលិកទាំងអស់ទទួលបានព័ត៌មានពីមូលដ្ឋានថាតើនរណាអាចជួយសង្គ្រោះបឋមបាន អ្វីទៅជានិតិវិធីនៃការសង្គ្រោះជាមូលដ្ឋាន របៀបនៃការស្វែងរកការសង្គ្រោះបន្ទាន់នៅក្នុងកន្លែងធ្វើការ និងមានជាច្រើនទៀត។
លោក បានបញ្ជាក់ថា៖ «វាពិតជាមានសារៈសំខាន់សម្រាប់អ្នករាល់គ្នាដែលធ្វើការនៅក្នុងការិយាល័យដែលទទួលបានវគ្គបណ្តុះបណ្តាលនេះ ពីព្រោះឧប្បតិ្តហេតុកើតឡើងគ្រប់ទីកន្លែងនិងគ្រប់ពេលវេលា។»
ពាក់ព័ន្ធនឹងបញ្ហាដដែល លោកវេជ្ជបណ្ឌិត និន សុខរង្សី នាយកវេជ្ជសាស្ត្រនៃមជ្ឈមណ្ឌលសុខភាពសិស្ស បានពន្យល់ពីសារៈសំខាន់និងវិធីក្នុងការសង្គ្រោះបឋមថា ការសង្គ្រោះបឋម គឺជាការជួយសង្គ្រោះបន្ទាន់ដល់អ្នកជំងឺ ឬអ្នករងគ្រោះរបួស ខណៈពេលរង់ចាំក្រុមសង្គ្រោះ ផ្នែកវេជ្ជសាស្រ្ត ជំនាញមកដល់។ លោក បន្ថែមថា ការសង្គ្រោះបឋម មិនតម្រូវឱ្យមានចំណេះដឹងផ្នែកបច្ចេកទេសច្រើនទេ ឬក៏ឧបកណ៍ពិសេសៗណាឡើយ។
បើតាមការពន្យល់ពីវេជ្ជបណ្ឌិតជំនាញរូបនេះ ការសង្គ្រោះបឋម គឺការធ្វើឱ្យមានចលនាបេះដូងឡើងវិញ និងដង្ហើមឡើងវិញតាមបច្ចេកទេស CPR ដោយការសង្កត់ទ្រូងប្រើម្រាយដៃពីរចំពោះមនុស្សពេញវ័យ និងកូនក្មេង ដែលតម្រូវឱ្យសង្កត់ឱ្យខ្លាំង សង្កត់ឱ្យលឿន។ មុនដំបូងនោះគឺដាក់ដៃម្ខាងពីលើដៃម្ខាងទៀតឱ្យបានស្រួល ខ្ទាស់ម្រាមដៃចូលគ្នាដើម្បីឱ្យមានលំនឹង វិធីក្នុងការង្កត់ទ្រូងតម្រូវឱ្យប្រើកែងបាតដៃ។ ជាមួយនឹងគ្នានេះ អ្នកជួយសង្គ្រោះនោះ ត្រូវពង្រឹងស្មារបស់អ្នកឱ្យត្រង់ចំពីលើទ្រូងរបស់អ្នកជំងឺ សង្កត់៣០ដង និងផ្លុំខ្យល់២ដងផងដែរ។
បន្ថែមពីនេះ លោកវេជ្ជបណ្ឌិតជំនាញក៏បាន បង្ហាញពីការសង្គ្រោះបឋម ជាច្រើនផ្សេងទៀតដូចជា ការហូរឈាម ការស្លាក់ ការពុល ការសន្លប់បាត់ស្មារតីឬខ្យល់គ ការបាក់ឆ្អឹង របួសកោសិកាខាងក្រៅ របួសក្បាលនិងឆ្អឹងខ្នង របួសក្បាល ការរលាក សត្វទិចឬខាំ ពស់ចឹក ការបាក់ធ្មេញ និងការសង្គ្រោះបឋមនានាជាច្រើនទៀត។
«យ៉ាងណាក្តី ការសង្គ្រោះជីវិត ការពារការបាត់បង់ស្មារតី ការពារដើម្បីកុំឱ្យសភាពជំងឺកាន់តែធ្ងន់ទៅៗ និងជួយឱ្យឆាប់ដឹងខ្លួន។» នេះបើតាមការបញ្ជាក់របស់លោក និន សុខរង្សី នាយកវេជ្ជសាស្ត្រនៃមជ្ឈមណ្ឌលសុខភាពសិស្ស និន សុខរង្សី៕
.jpg)
.jpg )
