របបយោធាមីយ៉ាន់ម៉ា គ្រោងបោះឆ្នោតជាមួយនឹងច្បាប់តឹងរឹងសម្រាប់គណបក្សនយោបាយ
ប្រភពរូបភាព៖ The Straits Times
ចាប់តាំងពីរដ្ឋប្រហារកាលពីឆ្នាំ២០២១ដែលបានផ្តួលរំលំរដ្ឋាភិបាលស៊ីវិលរបស់លោកស្រី អ៊ុងសាន ស៊ូជី មក ប្រទេសមីយ៉ាន់ម៉ា បានស្ថិតនៅក្រោមការដាក់ទណ្ឌកម្មយ៉ាងខ្លាំងក្លាពីសហរដ្ឋអាមេរិក និងសហភាពអឺរ៉ុប ហើយដើម្បីស្វែងរកការបន្ធូរបន្ថយសម្ពាធពីអន្តរជាតិ មេដឹកនាំរដ្ឋប្រហារ លោក មីន អ៊ុងឡាំង បាននិយាយថា ការបោះឆ្នោតសភាទំនងជានឹងធ្វើឡើងនៅខែសីហា ឆ្នាំ២០២៣ខាងមុខនេះ។
ជាជំហានដំបូងក្នុងដំណើរការបោះឆ្នោត របបយោធា បានចេញច្បាប់កម្រាស់២០ទំព័រ ដែលកំណត់ច្បាប់ដ៏ស្មុគស្មាញ និងតឹងរ៉ឹងសម្រាប់គណបក្សនយោបាយដែលសង្ឃឹមថានឹង ប្រកួតប្រជែង។
យោងតាមច្បាប់ថ្មី គណបក្សសម្ព័ន្ធជាតិដើម្បីប្រជាធិបតេយ្យរបស់លោកស្រី ស៊ូជី ដែលបានឈ្នះការបោះឆ្នោតភ្លូកទឹកភ្លូកដីកាលពីឆ្នាំ២០២០ អាចត្រូវបានរារាំង។ មិនតែប៉ុណ្ណោះ គណបក្សមួយអាចនឹងត្រូវរំលាយ ប្រសិនបើមានការប្រកាសថាខុសច្បាប់ ឬត្រូវបានចោទប្រកាន់ថាមានទំនាក់ទំនងជាមួយអង្គការភេរវករ។
ច្បាប់នេះ ក៏បានបង្កើនតម្រូវការសមាជិកភាពនៃគណបក្សនយោបាយប្រជែងយកអាសនៈទូទាំងប្រទេសផងដែរ។ បច្ចុប្បន្ន គណបក្សនយោបាយ នឹងតម្រូវឱ្យមានសមាជិកយ៉ាងតិច១០០ ០០០នាក់ក្នុងរយៈពេលបីខែ គិតចាប់ពីថ្ងៃទទួលបានការយល់ព្រម ហើយត្រូវដាក់ប្រាក់បញ្ញើជិត៥០ ០០០ដុល្លារអាមេរិកនៅធនាគារ Myanma Economic ដែលជាកម្មសិទ្ធិរបស់រដ្ឋ។
ច្បាប់ដដែល បានចែងទៀតថា គណបក្សនយោបាយដែលមានស្រាប់នឹងត្រូវរំលាយចោល ប្រសិនបើពួកគេខកខានក្នុងការចុះឈ្មោះឡើងវិញនៅគណៈកម្មការរៀបចំការបោះឆ្នោតសហភាពក្នុងរយៈពេលពីរខែ ខណៈពួកគេត្រូវបើកការិយាល័យឱ្យបានពាក់កណ្តាលនៃ៣៣០សង្កាត់ទូទាំងប្រទេស ក្នុងរយៈពេល៦ខែបន្ទាប់ពីការចុះឈ្មោះ។ លើសពីនេះទៀត របបយោធាមានសិទ្ធិរំលាយគណបក្សណាមួយ ប្រសិនបើខ្លួនមិនទទួលបានសំឡេងពាក់កណ្តាលនៃមណ្ឌលបោះឆ្នោតទាំងអស់ ហើយមិនអាចចូលរួមប្រកួតប្រជែងក្នុងការបោះឆ្នោតជ្រើសតាំងតំណាងរាស្ត្រទេ។
កាលពីខែវិច្ឆិកា រដ្ឋមន្ត្រីការបរទេសអាមេរិក លោក Antony Blinken បានជំរុញសហគមន៍អន្តរជាតិឱ្យបដិសេធចំពោះភាពជឿជាក់ណាមួយរបស់របបយោធាដែលព្យាយាមរៀបចំការបោះឆ្នោតជាតិ ដោយមិនមានអត្ថន័យចូលរួមជាមួយមេដឹកនាំគាំទ្រលទ្ធិប្រជាធិបតេយ្យ។
លោកបានលើកឡើងយ៉ាងដូច្នេះ «ការបោះឆ្នោតក្លែងក្លាយដែលបានគ្រោងទុករបស់របបនេះ ដែលមិនអាចទៅរួចដោយសេរី និងយុត្តិធម៌ក្នុងបរិបទបច្ចុប្បន្ន នឹងធ្វើឱ្យមានអំពើហិង្សាកាន់តែខ្លាំង អូសបន្លាយវិបត្តិ និងពន្យារការផ្លាស់ប្តូររបស់ប្រទេសទៅកាន់លទ្ធិប្រជាធិបតេយ្យ និងស្ថិរភាព»៕
