ជប៉ុន និងហូឡង់ នឹងសហការជាមួយអាមេរិករារាំងបន្ទះឈីបសម្រាប់ចិន
ប្រភពរូបភាព៖ The Straits Times
សារព័ត៌មាន The Straits Times បានឱ្យដឹងថា មន្ត្រីអាមេរិក ហូឡង់ និងជប៉ុន គ្រោងនឹងបញ្ចប់កិច្ចចរចាឱ្យបានឆាប់នៅថ្ងៃសុក្រនេះ (ម៉ោងនៅសហរដ្ឋអាមេរិក) លើការកំណត់ថ្មីចំពោះអ្វីដែលអាចផ្គត់ផ្គង់ដល់ក្រុមហ៊ុនចិន ក៏ប៉ុន្តែមិនមានផែនការសម្រាប់ការប្រកាសជាសាធារណៈអំពីការរឹតបន្តឹងដែលទំនងជានឹងត្រូវអនុវត្តនោះទេ ហើយអ្នកនាំពាក្យក្រុមប្រឹក្សាសន្តិសុខជាតិ ក៏បដិសេដធ្វើអត្ថាធិប្បាយដែរ។
គួរបញ្ជាក់ថា កិច្ចខិតខំប្រឹងប្រែងរួមគ្នានេះ បានពង្រីកបន្ថែមទៀតលើការរឹតបន្តឹងដែលរដ្ឋបាលលោក ចូ បៃដិន បានបង្ហាញកាលពីខែតុលាឆ្នាំមុន ក្នុងគោលបំណងកាត់បន្ថយសមត្ថភាពរបស់ប្រទេសចិនដើម្បីផលិតឧបករណ៍កម្រិតខ្ពស់របស់ខ្លួន ឬទិញបន្ទះឈីបទំនើបៗពីបរទេសដែលនឹងជួយដល់សមត្ថភាពយោធា និងបញ្ញាសិប្បនិម្មិត។
យ៉ាងណាមិញ ក្រុមហ៊ុនផលិតគ្រឿងបរិក្ខាររបស់សហរដ្ឋអាមេរិក បានត្អូញត្អែរថា សកម្មភាពឯកតោភាគីរបស់រដ្ឋបាលលោក ចូ បៃដិន បានអនុញ្ញាតឱ្យដៃគូប្រកួតប្រជែងនៅក្រៅប្រទេសបន្តប្រតិបត្តិការនៅក្នុងទីផ្សារដ៏ធំបំផុតសម្រាប់ផលិតផលរបស់ពួកគេ និងធ្វើឱ្យខូចដល់គោលបំណងនៃការរឹតបន្តឹងការរីកចំរើនផ្នែកយោធារបស់ប្រទេសចិន៕
