.jpg){kind=spacer}
Under_Article_and_Middle_Ads_banner-01.jpg)
សិស្សានុសិស្សនៃសាលាបឋមសិក្សាថ្មកង្កែប គួច ប៉េងសាំង ងិន ហួយ និងប្រជាជនជិត២០០០នាក់ ទទួលបានអំណោយពីអ្នកឧកញ៉ា វេជ្ជបណ្ឌិត គួច ម៉េងលី និងក្រុមគ្រួសារ
កុមារី សុខុម សុមាន សិស្សថ្នាក់ទី៦នៃសាលាបឋមសិក្សាថ្មកង្កែប គួច ប៉េងសាំង ងិន ហួយ បាននិយាយថា៖ «ខ្ញុំសប្បាយចិត្តណាស់ ដែលបានជួបលោកពូផ្ទាល់ឆ្នាំនេះ ព្រោះគាត់ជាមនុស្សម្នាក់ដែលបានជួយឧបត្ថម្ភសាលាខ្ញុំច្រើន ទាំងលុយកាក់ សាលារៀន អាហារហូបចុក និងសម្ភារៈសិក្សា។ សូមឱ្យលោកពូមានសុខភាពល្អ និងបន្តជួយសាលាពួកយើងទៀត»។
ក្នុងនាមជានាយកសាលាបឋមសិក្សា ថ្មកង្កែប គួច ប៉េងសាំង ងិន ហួយ លោក យ៉ន ម៉ៅ បានលើកឡើងថា៖ អ្នកឧកញ៉ានិងក្រុមគ្រួសារ គឺតែងតែជួយសាលានេះជាប្រចាំ តាំងពីឆ្នាំ២០០៨មក ដោយជួសជុលអគារ គួច ប៉េងសាំង ចំនួន១ខ្នង និងសាងសង់អគារថ្មី១ខ្នង មាន៤បន្ទប់ សង់បង្គន់អនាម័យ ខ្លោងទ្វារ របងសាលា ជួយសម្ភារៈសិក្សា ទាំងសៀវភៅរឿងនិងគ្រឿងបរិក្ខានៅបណ្ណាល័យផង។
.jpg)
នាយកសាលាបឋមសិក្សា ថ្មកង្កែប គួច ប៉េងសាំង ងិន ហួយ លោក យ៉ន ម៉ៅ
លោកក៏បញ្ជាក់ដែរថា ពីដើមមិនសូវមានសិស្សមករៀនទេ តែតាំងពីមានអគារសិក្សាថ្មីមក កំណើនសិស្សក៏ចាប់ផ្តើមកើនឡើងច្រើនជាងមុន ហើយអាណាព្យាបាលសិស្សក៏យល់ដឹងច្រើនពីតម្លៃនៃការសិក្សា។ បច្ចុប្បន្ន យើងមានបង្រៀនពីមត្តេយ្យថ្នាក់ទាបរហូតដល់ថ្នាក់ទី៦ សរុបសិស្សទាំងអស់មាន៣៣៩នាក់។ លោកនាយកសង្ឃឹមថា អ្នកឧកញ៉ានឹងបន្តជួយជ្រោមជ្រែងវិស័យអប់រំនៅទីនេះឱ្យសាលាមានស្តង់ដារនិងបច្ចេកទេសឱ្យកាន់តែល្អប្រសើរ។ លោកក៏សំណូមពរ សុំអ្នកឧកញ៉ាជួយធ្វើរបងដើម្បីបង្ការសត្វពាហនៈកុំឱ្យមកបំផ្លាញដំណាំនៅក្នុងសាលា និងជំនួសរបងខ្លះដែលបាក់បែកទៅ។
ក្នុងនាមជាម្ចាស់ជំនួយនិងជាស្រុកកំណើតរបស់ឪពុកនិងយាយផងនោះ អ្នកឧកញ៉ា វេជ្ជបណ្ឌិត គួច ម៉េងលី បានលើកឡើងថា៖ ខ្ញុំមកទីនេះជាង២០ដងទៅហើយ បើពុកម៉ែរបស់ខ្ញុំគឺមករាល់ឆ្នាំ ដោយភ្ជាប់ជាមួយអំណោយ ចំណីអាហារ លុយកាក់តិចតួចជូនដល់ប្រជាពលរដ្ឋនិងសិស្សានុសិស្ស ហើយសប្បាយដែលបានជួបជុំពួកគាត់។
.jpg)
អ្នកឧកញ៉ា វេជ្ជបណ្ឌិត គួច ម៉េងលី
អ្នកឧកញ៉ាសង្កេតឃើញថា បើប្រៀបធៀបកាលពីមុន សព្វថ្ងៃអ្នកភូមិទាំងមូលជឿនលឿនច្រើន ប្តូរពីផ្ទះតូចៗមកជាផ្ទះធំ តែការយល់ដឹងអំពីបញ្ហាសុខភាព នៅមានកម្រិត ប្រជាជនមានជំងឺរ៉ាំរៃច្រើន ស្លេកស្លាំង ការហូបចុកមិនត្រឹមត្រូវ ការរស់នៅមិនទាន់បានល្អប្រសើរ ហើយមិនទាន់មានការបណ្តុះស្មារតីឱ្យយល់ដឹងពីសុខភាពបានទូលំទូលាយនិងមាននិរន្តរភាពទេ ក៏ព្រោះទីនេះហាក់ដូចជាតំបន់ដាច់ស្រយាលមួយ ដែលត្រូវធ្វើដំណើរឆ្លងស្រឡាង ហើយចំណាយពេលវេលាយូរ។ លើសពីនោះ កង្វះទឹក ក៏ជាបញ្ហាប្រឈមសម្រាប់អ្នកស្រុកភូមិនេះដែរ ហើយលោកក៏ធ្លាប់ជីកអណ្តូងដល់ទៅ៤ដង អស់ជាង៤ម៉ឺនដុល្លារ។
អ្នកឧកញ៉ាសង្ឃឹមថា ដំណឹងពីរាជរដ្ឋាភិបាលគ្រោងនឹងសង់ស្ពានឆ្លងទន្លេនៅឆ្នាំង២០២៤នេះ នឹងធ្វើឱ្យជីវភាពរស់នៅរបស់ប្រជាជនកាន់តែល្អប្រសើរ ហើយក៏ជាមធ្យោបាយក្នុងការផ្សារភ្ជាប់ទំនាក់ទំនងពីជនបទនេះ ទៅកាន់ទីក្រុងកាន់តែងាយស្រួល ទាំងការរកស៊ី ទាំងការព្យាបាលជំងឺ និងការអប់រំ ហើយអ្នកឧកញ៉ាក៏សន្យានឹងនាំគ្រូពេទ្យចល័ត រួមទាំងថ្នាំសង្កូវមកពិនិត្យសុខភាពនិងផ្តល់ជូនប្រជាជននៅទីនេះឱ្យបានច្រើនជាងមុន។ ចំណែកការអប់រំនៅទីនេះ ក៏ត្រូវការការរួមចំណែកពីគ្រប់ភាគីពាក់ព័ន្ធដើម្បីភាពល្អប្រសើរសម្រាប់ក្មេងៗនៅតំបន់នេះ មិនអាចមានតែអ្នកឧកញ៉ាម្នាក់ឯងនោះឡើយ។
សូមបញ្ជាក់ថា បើតាមរបាយការណ៍ពីមូលនិធិ ម៉េងលី ជេ. គួច ចាប់តាំងពីឆ្នាំ២០០៥មកដល់សព្វថ្ងៃនេះ គឺចំណាយទឹកប្រាក់អស់រាប់សិបម៉ឺនដុល្លារហើយ ក្នុងការជួយភូមិឃុំនានាក្នុងទឹកដីខេត្តកំពង់ឆ្នាំង មានដូចជា៖ សាងសង់សាលាបឋមសិក្សាថ្មកង្កែប គួច ប៉េងសាំង ងិន ហួយ និងសម្ភារៈសិក្សាដល់សិស្ស រួមទាំងបណ្ណាល័យ បង្គន់អនាម័យ កសាងវត្តគិរីសេត្ថារាម (វត្តថ្មកង្កែប) អណ្តូងទឹក ចែកកង់ដល់សិស្សក្រីក្រ តទុយោទឹកនិងសង់ស៊ីទែនទឹកស្អាត សម្ភារៈបណ្ណាល័យដល់សាលាបឋមសិក្សាយុគន្ធរ ស្រុកបរិបូរ ចែកអង្ករ គ្រឿងឧបភោគបរិភោគ និងថវិកាដល់ប្រជាពលរដ្ឋក្រីក្រជាច្រើនគ្រួសារនៅក្នុងស្រុកកំពង់លែង៕
.jpg)
.jpg)
.jpg)
.jpg)
.jpg)
Under_Article_and_Middle_Ads_banner-01.jpg)
