.jpg){kind=spacer}
Under_Article_and_Middle_Ads_banner-01.jpg)
បទយកការណ៍៖ យុវជនសម័យថ្មីនិយមលើការងារស្ម័គ្រចិត្ត ដើម្បីកិច្ចការសង្គមជាជាងទុកពេលទំនេរ
យុវជនកម្ពុជានាពេលបច្ចុប្បន្ន ត្រូវបានគេសង្កេតឃើញថា មានទំនោរ និងពេញនិយមទៅលើការងារស្ម័គ្រចិត្ត ដើម្បីរួមចំណែកដោះស្រាយ និងអភិវឌ្ឍសហគមន៍ នៅតាមបណ្ដាវិស័យនានាទូទាំងប្រទេស។ ការងារស្ម័គ្រចិត្តនេះ ត្រូវបានចាត់ទុកជាការងារយ៉ាងសំខាន់នៅក្នុងសង្គម ជាពិសេស បង្កើននូវការកសាងសមត្ថភាព ចំណេះដឹង ចំណេះធ្វើ និងបទពិសោធ របស់សិស្ស និស្សិត និងយុវជន ដើម្បីឈានទៅភាពល្អប្រសើរនាពេលបច្ចុប្បន្ន និងអនាគត។
ពាក់ព័ន្ធបញ្ហាការងារស្ម័គ្រចិត្តនេះ បើតាមយុវតី ឌី ស្រីលក្ខ និស្សិតសិក្សាផ្នែកអក្សរសាស្ត្រខ្មែរ ឆ្នាំទី៣ នៃសាកលវិទ្យាល័យភូមិន្ទភ្នំពេញ បានប្រាប់អ្នកសារព័ត៌មានយើងថា «ការងារស្ម័គ្រចិត្តផ្ដល់ឱកាសឱ្យខ្ញុំហ្វឹកហាត់ការងារ ហើយស្គាល់ពាក្យថាអ្វីទៅជាការងារនិងសង្គមខាងក្រៅ ស្គាល់មនុស្សជាច្រើនពីមនុស្សដែលមានសក្ដានុពលក្នុងសង្គមដោយទទួលបាននូវមតិណែនាំដ៏ល្អជាច្រើនផងដែរ។ បង្កើនឱកាសការងារដល់រូបខ្ញុំ ទៀតសោតដោយការអនុវត្ដការងារជាក់ស្ដែង ដោះស្រាយបញ្ហា ទំនាក់ទំនងល្អជាមួយមនុស្សជុំវិញខ្លួន និងក្លាយជាយុវជនប្រកបទៅដោយវិជ្ជាជីវ:»។
និស្សិតដដែលបានបន្តថា ការងារស្ម័គ្រចិត្តបានផ្ដល់នូវផលប្រយោជន៍ជាច្រើន ជាពិសេស ទទួលបាននូវបទពិសោធថ្មីៗ ចំណេះដឹងទូលំទូលាយ បង្រៀនឱ្យអត់ធ្មត់និងការងារ ចេះគ្រប់គ្រងពេលវេលា ចេះគ្រប់គ្រងអារម្មណ៍ និងស្គាល់ខ្លួនឯងកាន់តែច្បាស់ជាងមុន។ ជាពិសេស ការងារស្ម័គ្រចិត្តអាចអភិវឌ្ឍអាកប្បកិរិយាល្អចំពោះខ្លួនឯងដោយពង្រឹងការទទួលខុសត្រូវចំពោះការងារ ពេលវេលា និងកាតព្វកិច្ចរបស់ខ្លួនកាន់តែល្អជាងមុន រួមទាំងមានទំនុកចិត្តក្នុងការបញ្ចេញមតិ និងដោះស្រាយបញ្ហាជាក់ស្ដែងក្នុងសង្គម។
រូបភាព៖ ឌី ស្រីលក្ខ
ប្រឡូកក្នុងវិស័យការងារជានិស្សិតស្ម័គ្រចិត្ត៣ឆ្នាំ នៅសមាគមវិទ្យាសាស្ត្រស្រាវជ្រាវ និងកិច្ចការសង្គម យុវតី ឌី ស្រីលក្ខ បានបង្ហើបថា «ការងារសង្គមនេះមិនបានផ្ដល់ផលប៉ះពាល់ដល់ការសិក្សារបស់ខ្ញុំទេ ព្រោះខ្ញុំបានធ្វើការបែងចែកពេលវេលាច្បាស់លាស់ រវាងពេលវេលាសិក្សា និងពេលវេលាដែលត្រូវចូលរួមការងារសង្គម»។
«ខ្ញុំសម្រេចចិត្តប្រឡូកក្នុងការងារស្ម័គ្រចិត្ត ព្រោះជាការងារមួយដែលខ្ញុំស្រឡាញ់ពេញចិត្តនិងចូលរួមដើម្បីក្លាយខ្លួនឱ្យទៅជាយុវជនមួយរូបជួយដល់សង្គមជាតិ។ សកម្មភាពសង្គមទាំងនេះត្រូវទៅនឹងគោលដៅអនាគតរបស់ខ្ញុំ ក្នុងនាមខ្ញុំជានិស្សិតមួយរូបក្រៅពីការសិក្សានៅក្នុងសាលា អ្វីដែលខ្ញុំគួរតែស្វែងយល់នោះ គឺការងារសង្គមជាក់ស្ដែងខាងក្រៅ ដោយការរួមផ្សំជាមួយការសិក្សាក្នុងសាលា និងការចូលប្រឡូកការងារសង្គមដែលជាមេរៀនដ៏ល្អសម្រាប់ជាស្ពានឱ្យខ្ញុំឈានទៅរកភាពជោគជ័យដែលខ្ញុំប្រាថ្នាចង់បាន»។ នេះបើតាមការអះអាងរបស់យុវតីចូលរួមការងារស្ម័គ្រចិត្តដដែលខាងលើ។
ស្រដៀងគ្នានេះ យុវជន នូវ សុថានឹត បានប្រាប់ The Intercon Rooster ដូច្នេះថា «ការប្រឡូកចូលក្នុងការងារស្ម័គ្រចិត្ត ព្រោះតាមភាពជាក់ស្តែងនៅក្នុងសង្គមប្អូនបានឃើញថា មនុស្សយើងម្នាក់ៗសុទ្ធតែមានចិត្ត ផ្នត់គំនិត និងសមត្ថភាពរៀងៗខ្លួន។ ហើយវាក៏ជាវិស័យ ឬក្តីសង្ឃឹមមួយដែលដឹកនាំឱ្យយើងយល់ដឹងអំពីការខ្វៈខាតនៅក្នុងសង្គម ដែលមនុស្សយើងគ្រប់រូបកំពុងតែជួបទុក្ខលំបាក និងខ្វះខាតជាច្រើន។ បន្ថែមពីនេះទៅទៀត ការងារស្ម័គ្រចិត្តបានដឹកនាំឱ្យមនុស្សដែលរស់នៅជុំវិញពិភពលោកទទួលបាននូវចំណេះដឹង ក៏ដូចជាចំណេះធ្វើ និងជំនាញផ្សេងៗនៅថ្ងៃអនាគត»។
ស្ថិតក្នុងវ័យ២០ឆ្នាំ យុវជនរូបនេះបន្តថា ការងារសង្គមផ្តល់ផលប្រយោជន៍ដល់ខ្លួន ដែលអាចយល់ដឹងអំពីស្ថានភាពសង្គមជាក់ស្តែង ដឹងពីការសហការការងារជាក្រុម និងទទួលបានបទពិសោធថ្មីៗជាច្រើនទៀត។ លើសពីនេះ សកម្មភាពទាំងនោះក៏អាចចំគោលដៅ និងអនាគតរបស់ប្អូន ដែលជួយទៅដល់ចាស់ជរា កុមារកំព្រា ជនពិការ និងជនក្រីក្រជាដើម។ សុថានឹត បញ្ជាក់ថា «មិនសំខាន់ទៅលើការងារអ្វីទេ ឱ្យតែជាការងាប្រកបទៅដោយសុចរិត និងក្រមសីលធម៌ល្អនៅក្នុងសង្គម ដែលមិនមានការស្អប់ខ្ពើមឡើយ គឺសុទ្ធសឹងមានតម្លៃទាំងអស់»។
រូបភាព៖ នូវ សុថានឹត
ទន្ទឹមនឹងគុណតម្លៃដែលមិនអាចកាត់ថ្លៃបាន ការងារស្ម័គ្រចិត្តនេះក៏ទាមទារឱ្យយុវជនមានភាពអត់ធ្មត់ និងមានឆន្ទៈខ្ពស់ផងដែរ។ ជានិស្សិតកំពុងសិក្សានៅសាកលវិទ្យាល័យជាតិគ្រប់គ្រង និងកំពុងធ្វើការស្ម័គ្រចិត្តនៅតាមស្ថាប័នមួយចំនួន និងជាយុវជនកម្មវិធីការស្ម័គ្រចិត្តដើម្បីសហគមន៍ខ្ញុំ នៃក្រសួងអប់រំ យុវជន និងកីឡា ផងនោះ សុថានឹត បន្តបញ្ជាក់ថា «ការងារស្ម័គ្រចិត្តទាំងនេះ តម្រូវឱ្យយើងមានភាពអត់ធ្មត់ជាច្រើនដូចជា ចូលរួមសកម្មភាពឱ្យបានច្រើន ការព្យាយាម ការតស៊ូ ហ៊ានពុះពារ មិនខ្លាចហត់ ពេញចិត្តនិងការងារ។ ក្រៅពីនេះ ចេះសហការជាក្រុម មានសីលធម៌ល្អនៅក្នុងសង្គម ចេះគោរព ស្រឡាញ់មនុស្សដែលនៅជុំវិញខ្លួន ទទួលស្គាល់អ្វីដែលជាការពិត និងចេះដឹកនាំសង្គមទៅកាន់ភាពរីកចម្រើន»។
មិនខុសគ្នានេះប៉ុន្មាន យុវជន ដារ៉ា វីនណៃ និស្សិតសិក្សាផ្នែកនីតិសាស្ត្រ នៃសកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច និងជាអ្នកស្ម័គ្រចិត្តនៅក្នុងសមាគមវិទ្យាសាស្ត្រស្រាវជ្រាវ និងកិច្ចការសង្គម បានឱ្យដឹងដែរថា ការងារសង្គមបានផ្តល់នូវសារៈសំខាន់មួយផ្នែកក្នុងជីវិតរបស់ខ្លួន។ វីនណៃ ថា «ការងារនេះផ្តល់ឱកាសឱ្យខ្ញុំបានបង្ហាញនូវសមត្ថភាព និងបង្ហាញពីចំណុចខ្វះខាតរបស់យើងដែលយើងមិនអាចមើលឃើញដោយខ្លួនឯងផ្ទាល់។ ដូច្នេះនៅពេលដែលយើងប្រឡូកក្នុការងារស្ម័គ្រចិត្ត នឹងមានការចង្អុលបង្ហាញពីថ្នាក់ដឹកនាំ គាត់តែងជួយបង្ហាត់បង្ហាញ និងតម្រង់ទិសដល់ខ្ញុំ នៅត្រង់ចំណុចណាដែលខ្ញុំខ្វះខាត។ អ្វីដែលកាន់តែពិសេសការងារសង្គម គឺពិតជាត្រូវនឹងគោលដៅនៃជីវិតរបស់យើងខ្លាំងមែនទែន ព្រោះការងារសង្គមគឺយើងបានសម្របខ្លួនទៅនឹងសង្គម យើងបានចូលរួមក្នុងសហគមន៍ យើងបានធ្វើការងារជាមួយសង្គមខាងក្រៅ ការសហការការងារជាក្រុម យើងបានចូលរួមក្នុងសហគមន៍ គ្រប់សកម្មភាព គ្រប់មជ្ឈដ្ឋាន សង្គមពិតជាក់ស្តែង ដែលអាចឱ្យយើងបានយល់ដឹងពីគ្រប់ស្ថានភាពនៃសង្គមខាងក្រៅ»។
រូបភាព៖ ដារ៉ា វីនណៃ
ឆ្លើយតបទៅនឹងសំណួរអ្នកសារព័ត៌មានយើងដែលបានសួរថា ការងារសង្គមល្អហើយ ប៉ុន្តែគួរប្រុងប្រយ័ត្នកុំឱ្យគេបោកប្រើ តើប្អូនយល់យ៉ាងណាចំពោះមតិនេះ? វីនណៃ បាននិយាយថា «ការងារសង្គមបើយើងស្តាប់ទៅគឺបានជួយដល់សង្គមមួយហើយ គឺមានន័យថាការងារហ្នឹងគឺយើងបានសម្របខ្លួនជាមួយនឹងសង្គម ក៏ប៉ុន្តែការងារសង្គមខ្លះគឺបុគ្គលថ្នាក់ដឹកនាំមួយចំនួន គឺគាត់បានទាញផលប្រយោជន៍ទៅលើវាគឺមានន័យថា គឺគាត់បានបញ្ចូលនូវផលប្រយោជន៍ទៅដល់សង្គមតិចជាងផលប្រយោជន៍ដែលគាត់ទទួលបាន មានន័យថាគាត់គិតតែពីផលប្រយោជន៍របស់គាត់។ ដូច្នេះហើយ យើងជាយុវជនមួយរូបដែលយើងស្ម័គ្រចិត្តជាមួយនឹងការងារសង្គមនោះ គឺយើងត្រូវតែមានភាពវៃឆ្លាត យើងត្រូវតែមើលទៅលើការងារសង្គមនោះ តើការងារសង្គមនោះគឺវាបានជួយទៅដល់សង្គម ឬសហគមន៍យើងពិតដែរឬទេ? ប្រសិនបើយើងមើលឃើញរូបភាពថាការងារនោះមិនបានជួយដល់សង្គមយើងទាំងមូលទេ វាផ្តល់តែផលប្រយោជន៍ទៅដល់បុគ្គលមួយទេ គឺយើងសូមមេត្តាបញ្ឈប់នូវការងារស្ម័គ្រចិត្តរបស់យើងជាមួយនឹងកន្លែងហ្នឹងភ្លាម ហើយយើងទៅរកកន្លែងស្ម័គ្រចិត្តមួយទៀតដែលជួយសង្គមពិតប្រាកដ។»
រដ្ឋមន្រ្តីក្រសួងអប់រំ យុវជន និងកីឡា លោក ហង់ជួន ណារ៉ុន ធ្លាប់បានអះអាងថា រៀងរាល់ថ្ងៃអ្នកស្ម័គ្រចិត្តជាយុវជនរាប់ពាន់នាក់កំពុងធ្វើការងារស្ម័គ្រចិត្តដើម្បីរួមចំណែកដល់សន្តិភាព និងការអភិវឌ្ឍ ក៏ដូចជាធ្វើការដើម្បីសម្រេចគោលដៅអភិវឌ្ឍប្រកបដោយចីរភាព។ ឯកឧត្តមបន្តថា ដោយបង្កើនភាពស្អិតរមួត និងសាមគ្គីក្នុងរង្វង់សង្គមជាតិ ការស្ម័គ្រចិត្តពិតជាបានកសាងធនធានសង្គម ពីព្រោះការងារស្ម័គ្រចិត្តបានប្រែក្លាយពីសកម្មភាពបុគ្គលឱ្យទៅជាសកម្មភាពប្រមូលផ្តុំដែលជាការតម្រង់ទិសឆ្ពោះទៅបញ្ចប់ភាពទុក្ខលំបាករបស់សង្គម។ ការស្ម័គ្រចិត្តធ្វើឱ្យសង្គមប្រមូលផ្តុំជាធ្លុងមួយ ដើម្បីរួមគ្នាអភិវឌ្ឍសហគមន៍ ថែមទាំងផ្តល់ជាមធ្យោបាយសម្រាប់ឱ្យប្រជាជន បង្ហាញពីតម្លៃរបស់ពួកគាត់ និងបញ្ជាក់សារជាថ្មីថា ពួកគាត់ជាចំណែកដ៏មានសារៈសំខាន់សម្រាប់សង្គម។
លោក Robert Gillen នាយកផ្នែកយុទ្ធសាស្រ្តគុណភាពកម្មវិធី និងអភិវឌ្ឍធនធាន នៃអង្គការទស្សនៈពិភពលោកកម្ពុជាលើកឡើងថា ដោយមើលឃើញពីភាពចាំបាច់ នៃការងារស្ម័គ្រចិត្ត មានសមាជិកពីអង្គការពាក់ព័ន្ធ និងយុវជនស្ម័គ្រចិត្តចំនួន ៣៥៥នាក់ បានចូលរួមអនុវត្តកម្មវិធីមួយដែលមានឈ្មោះថា «ការស្ម័គ្រចិត្តដើម្បីសហគមន៍ខ្ញុំ» នៅទាំង២៥រាជធានីខេត្ត។
លោកបន្តថា តាមរយៈការងារស្ម័គ្រចិត្ត យុវជនបានកសាងទំនាក់ទំនងកាន់តែរឹងមាំជាមួយមិត្តភក្តិ លោកគ្រូ អ្នកគ្រូ ក្នុងសហគមន៍ និងជាមួយអាជ្ញាធរមូលដ្ឋានរបស់ពួកគេ។ លើសពីនេះការងារស្ម័គ្រចិត្ត ធ្វើឱ្យយុវជនជឿជាក់លើខ្លួនឯង ធ្វើឱ្យប្រសើរឡើងនូវជំនាញដោះស្រាយបញ្ហាតាមរយៈបទពិសោធអនុវត្តគម្រោងដែលពួកគាត់បានដឹកនាំ ។ ការងារស្ម័គ្រចិត្ត ក៏រួមចំណែកធ្វើឱ្យមានការផ្លាស់ប្តូរជាវិជ្ជមានសម្រាប់សហគមន៍ផងដែរ ពោលគឺតាមរយៈកម្មវិធីដែលដឹកនាំដោយយុវជន ។
រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង បានចាត់ទុកយុវជនជាធនធានដ៏មានសក្តានុពល និងជាកម្លាំងចលករដ៏សំខាន់របស់ប្រទេសជាតិ ដែលបច្ចុប្បន្នយុវជនបានដើរតួនាទីយ៉ាងសំខាន់ ក្នុងការចូលរួមអភិវឌ្ឍន៍សេដ្ឋកិច្ច និងសង្គមជាតិ ហើយប្រមុខរាជរដ្ឋាភិបាលកម្ពុជា តែងតែគិតគូរ និងលើកកម្ពស់យុវជនជាកម្លាំងជួរមុខរបស់ប្រទេស។ លោកបានចាត់ទុកយុវជនជាធនធានដ៏មានសក្តានុពល និងជាកម្លាំងចលករដ៏សំខាន់ក្នុងការចូលរួមអភិវឌ្ឍសេដ្ឋកិច្ចសង្គម។
ជាមួយគ្នានេះ និស្សិតស្ម័គ្រចិត្តនៅកម្ពុជា បានលើកទឹកចិត្ត និងជំរុញឱ្យយុវជន ជាពិសេស សិស្ស និស្សិត ស្វែងរកការងារស្ម័ក្រចិត្តនៅតាមស្ថាប័ននានា ដើម្បីពង្រឹងនូវសមត្ថភាព និងក្រេបជញ្ជក់នូវចំណេះដឹង ចំណេះធ្វើ និងបទពិសោធថ្មីៗ សម្រាប់បង្កើនសក្ដានុពល និងសមត្ថភាពការងារទាំងបច្ចុប្បន្ន និងអនាគត៕
Under_Article_and_Middle_Ads_banner-01.jpg)
