.jpg){kind=spacer}
Under_Article_and_Middle_Ads_banner-01.jpg)
ទីបំផុត AIS រកឃើញម្ចាស់ជ័យលាភីប្រកួតគូរគំនូរ និងតាំងពិព័រណ៍ស្នាដៃសិស្សលើកទី១៤ ហើយ
ថតដោយ៖ ផុន ផាឡែន
នៅក្នុងកម្មវិធីនេះ សិស្សានុសិស្សចាប់ពីថ្នាក់ទី២ ដល់ទី១២ បានដាក់តាំងស្នាដៃផ្សេងៗទៅតាមក្រុមនីមួយៗ ដែលមានស្នាដៃជាច្រើនសន្ធឹកសន្ធាប់បង្ហាញជូនដល់សិស្សានុសិស្ស លោកគ្រូ អ្នកគ្រូ មាតាបិតា ឬអ្នកអាណាព្យាបាលសិស្ស និងសាធារណជនដែលអញ្ជើញចូលរួមទស្សនា និងសិក្សាស្វែងយល់ ក៏ដូចជាចូលរួមប្រកួតប្រជែងដណ្តើមជ័យលាភីរៀងៗខ្លួន។ ក្រុមខ្លះបានរៀបចំដាក់តាំងជាប្រភេទស្នាដៃមានទាក់ទងនឹងការធ្វើម្ហូបអាហារបែបជាលក្ខណៈខ្មែរ ហើយខ្លះទៀតក៏មានដាក់តាំងជាកម្រងស្នាដៃដែលបានស្រាវជ្រាវផ្សេងៗជាដើម។
ទន្ទឹមនឹងនេះដែរ សាលាក៏មានរៀបចំកម្មវិធីមួយទៀតគឺការប្រកួតគូរគំនូរក្រោមប្រធានបទស្តីពី «កុមារ និងធម្មជាតិ» ហើយក្នុងដំណើរការនៃការប្រកួតប្រជែងគូរគំនូរនេះ បានប្រព្រឹត្តទៅដោយគណៈគ្រប់គ្រងសាលាបានបែងចែកសិស្សជាក្រុមៗ ហើយឱ្យក្រុមនីមួយៗជ្រើសរើសរូបភាពសម្រាប់យកគូរដោយខ្លួនឯងដោយគោរពតាមប្រធានបទដែលបានកំណត់។
លោក ជាង ប៊ុនលី នាយកចាងហ្វាងនៃសាលារៀន អន្តរទ្វីប អាមេរិកាំង សាខាចាក់អង្រែ ពេលកំពុងចាប់ផ្តើមការប្រឡងប្រកួតប្រជែង សិស្សានុសិស្សគ្រប់ក្រុមនីមួយៗ បានសហការគ្នា យ៉ាងសកម្ម ហើយតាមក្រុមនីមួយៗមានសិស្សខ្លះជាអ្នកគូររូបភាព រីឯសិស្សខ្លះទៀតជាអ្នកផាត់ពណ៌ លើរូបគំនូរ។
នៅពេលដែលសិស្សានុសិស្សចាប់ផ្តើមគូរគំនូរមានលោកគ្រូ អ្នកគ្រូជាអ្នកដើរត្រួតពិនិត្យ និងធ្វើការណែនាំតាមក្រុមនីមួយៗដើម្បីឱ្យសិស្សាមានស្មារតីប្រុងប្រយ័ត្នកាន់តែខ្ពស់។
លោក បន្តថា គណៈកម្មការបានវាយតម្លៃ និងដាក់ពិន្ទុយ៉ាងសុក្រឹតទៅលើស្នាដៃនីមួយៗ ហើយរកឃើញ ជើងឯកគូរគំនូរ និងតាំងពិពណ៌លើកទី១៤ ប្រចាំឆ្នាំ២០២២ បានទៅលើផ្នែកកុំព្យូទ័រចំនួន៣រូប, ផ្នែកគំនូរ៨រូប, ផ្នែកវិទ្យាសាស្ត្រពិតចំនួន៣២នាក់, និងផ្នែកវិទ្យាសាស្ត្រសង្គម ចំនួន ២២នាក់, ផ្នែកភាសាអង់គ្លេសចំនួន៤នាក់។ ដោយម្ចាស់ជ័យលាភីទាំងអស់នឹងទទួលបានមេដាយ បណ្ណសរសើរ កាដូអនុស្សាវរីយ៍ជាច្រើនទៀត។
លោក ជា សម្បត្តិ នាយកចាងហ្វាង នៃសាលារៀន អន្តរទ្វីប អាមេរិកាំង សាខាទួលគោក បានលើកឡើងថា «សាលារៀនរបស់យើង ចង់ឱ្យសិស្សានុសិស្សទាំងអស់បានបញ្ចេញស្នាដៃរបស់គាត់ ក្រៅពី ការអនុវត្តជាក់ស្តែងនៅក្នុងបន្ទប់ពិសោធន៍ ការសិក្សាទ្រឹស្តីនៅក្នុងថ្នាក់ ដែលរួមមានមុខវិជ្ជាគណិត រូប គីមីវិទ្យា ជីវៈ ផែនដី ចឹងគាត់មានឱកាសជាមួយនឹងក្រុមការងារគាត់ហ្នឹង គាត់អនុវត្តន៍ជាក់ស្តែងនៅខាងក្រៅដើម្បីធ្វើការប្រកួតប្រជែងយកចំណាត់ថ្នាក់លេខ១។»
យុវតី ជា ស៊ីហ្វុង សិស្សថ្នាក់ទី៨គ នៃសាលារៀន អន្តរទ្វីប អាមេរិកាំង សាខាចាក់អង្រែ និងម្ចាស់ជ័យលាភីលេខ១តំណាងក្រុមផ្នែកភាសាអង់គ្លេស លើប្រធានបទ Alternative Resources បានឱ្យដឹងពីអារម្មណ៍របស់ខ្លួន ក្រោយពេលទទួលជ័យជម្នះយ៉ាងដូច្នេះ «ខ្ញុំមានអារម្មណ៍រំភើបនិងសប្បាយរីករាយដូចគ្នា ដោយសារតែយើងបានខំប្រឹងប្រែងអស់ពីសមត្ថភាព យើងបានខិតខំខ្លាំងមែនទែនទៅលើការងារមួយហ្នឹង ហើយខ្ញុំក៏មិននឹកស្មានដល់ដូចគ្នា។»
ស៊ីហ្វុង បន្តថា ការចូលរួមប្រកួតនៅថ្ងៃនេះ ខ្លួនមិនរំពឹងថានឹងទទួលបានជ័យលាភីទេ តែអ្វីដែលខ្លួនរំពឹងចង់បានពីកម្មវិធីនោះ គឺបទពិសោធ។ ស៊ីហ្វុងបាននិយាយថា «ខ្ញុំចូលរួមប្រកួតមិនមែនសំដៅតែចង់ឈ្នះមួយមុខនោះទេ ឈ្នះគឺជារឿងទី២ទេ ប៉ុន្តែទីមួយនោះគឺយើងត្រូវតែចូលរួមមែនតែយើងត្រូវមានគោលដៅខ្លួនឯង ថាតើយើងធ្វើវា ដើម្បីអ្វី ដើម្បីអភិវឌ្ឍន៍ខ្លួនឯង ឱ្យទទួលបានអ្វីថ្មីៗពីព្រោះថា ជិវិតយើងៗអត់អាចធ្វើអ្វីដែលដដែលៗនោះទេ យើងត្រូវតែរៀនពីមួយថ្ងៃទៅមួយថ្ងៃគឺជួបអ្វីដែលថ្មីរហូត»។
មិនខុសគ្នានេះដែរ យុវសិស្ស សាមន មុន្នីវាសនា មកពីសាខាទួលគោក ដែលឈ្នះការប្រកួតផ្នែកវិទ្យាសាស្ត្រពិត លើការពិសោធ រូបធរណីមាត្រ បាននិយាយថា «នេះជាលើកទី១របស់ខ្ញុំហើយៗខ្ញុំមានអារម្មណ៍សប្បាយរីករាយខ្លាំងមែនទែន ហើយបើទោះជាមិនទទួលបានជ័យលាភី ឬអត់ក៏ខ្ញុំនៅតែចូលរួមប្រកួតទៀតដែរ ព្រោះចំណេះដឹងទាំងអស់នេះ ពិតជាធ្វើឱ្យខ្ញុំស្គាល់នូវអ្វីថ្មីៗ កើនចំណេះដឹងជាងមុន។»
គួរជម្រាបជូនថា កម្មវិធីប្រកួតគូរគំនូរ និងតាំងពិព័រណ៍ស្នាដៃសិស្សលើកទី១៤ ប្រចាំឆ្នាំ២០២២នេះ បានបង្ហាញឱ្យឃើញពីស្មារតីសាមគ្គីភាព សហការ ដឹកនាំ និងឯករាជ្យក្នុងការធ្វើការងារជាក្រុម ជាពិសេសវាជាពេលវេលាមួយដែលធ្វើឱ្យពួកគេអាចរឹតបន្តឹងចំណងមិត្តរបស់ពួកគេបានកាន់តែល្អប្រសើរជាមួយមិត្តរួមថ្នាក់ក៏ដូចជាមិត្តរួមជំនាន់៕
Under_Article_and_Middle_Ads_banner-01.jpg)
