_Khmer_(2).jpg)
ចំណូលរបស់អគ្គនាយកដ្ឋានគយ និងរដ្ឋាករកម្ពុជា ធ្លាក់ចុះក្នុងបីខែដំបូងនៃឆ្នាំ២០២១
ចំណូលសរុបដែលប្រមូលបានដោយអគ្គនាយកដ្ឋានគយ និងរដ្ឋាករកម្ពុជា នៅក្នុងរយៈពេល ៣ ខែដំបូងនៃ ឆ្នាំ ២០២១ នេះ បានថយចុះប្រមាណ ១៥ ភាគបើធៀបនឹងរយៈពេលដូចគ្នាកាលពីឆ្នាំមុន ។
យោងតាមរបាយការណ៍របស់អគ្គនាយកដ្ឋានគយ និងរដ្ឋាករ ដែលបានបង្ហាញក្នុងកិច្ចប្រជុំបូកសរុបការងារគយ និងរដ្ឋាករប្រចាំខែមីនា និងត្រីមាសទី១ ឆ្នាំ២០២១ បានឱ្យដឹងថា ក្នុងត្រីមាសដំបូងនៃឆ្នាំ ២០២១ រដ្ឋប្រមូលចំណូល ប្រមាណជាង ២ ៤៨៩ ពាន់លានរៀល ស្មើប្រមាណជាង ៦១៤ លានដុល្លារអាមេរិក ថយចុះប្រមាណជាង ១៥ភាគរយ បើធ្វើការប្រៀបធៀបនឹងរយៈពេលដូចគ្នាកាលពីឆ្នាំ២០២០ កន្លងទៅ ។
ជាមួយគ្នានេះដែរ ចំណូលដែលប្រមូលបាននៅក្នុងខែមីនា កន្លងទៅ មានចំនួនប្រមាណជាជាង ៨៥៥ ពាន់លានរៀល ស្មើជាង ២១១ លានដុល្លារ ពោលថយចុះប្រមាណជាង ៤ភាគរយ ធៀបនឹងខែមីនា ឆ្នាំមុន ។
ក្នុងចំណោមប្រភពចំណូលរួមាន អាករលើតម្លៃបន្ថែម (៣៧ ភាគរយ) អាករពិសេស (៣៨ ភាគរយ) ពន្ធគយ (១៧ភាគរយ) អាករបន្ថែមលើផលិផលប្រេង (៤ភាគរយ) និងអាករនាំចេញនិងកម្រៃផ្សេងៗ (២ ភាគរយ) ។
ទន្ទឹមនឹងនេះ ការនាំចេញផលិតផលកាត់ដេរ មានចំនួនជាង ២ ៥០០ លានដុល្លារ ថយចុះជាង ១៤៥ លានដុល្លារ ស្មើជាង ៥ ភាគរយ ធៀបរយៈពេលដូចគ្នាក្នុងឆ្នាំ២០២០ ។
ទោះជាយ៉ាងនេះក្តី ការនាំចេញផលិតផលកសិកម្មមានការកើនឡើងជាង ៧០ភាគរយ ជាមួយនឹងទំហំសរុបតម្លៃ ១ពាន់លានដុល្លារ ។
ការនាំចេញផលិតផលវិនិយោគខុសពីវិស័យកាត់ដេរដូចជា កង់ បង្គុំខ្សែភ្លើង គ្រឿងបន្លាស់រថយន្ត និងផលិតផលឧស្សាហកម្មផ្សេងៗទៀត ក៏មានការកើនឡើងផងដែរ ជាមួយទំហំគិតជាទឹកប្រាក់ ៨៨៧ លានដុល្លារ កើនឡើងជាងពាក់កណ្តាល ស្មើនឹងជាង ៣០០ លានដុល្លារ ធៀបនឹងត្រីមាសដំបូងឆ្នាំមុន ៕
